म अनुवाद परियोजनाहरूको प्रबन्धकको रूपमा काम गर्दै छु। हाम्रा ग्राहकहरूबाट काम पाइसकेपछि म सबै तालिका व्यवस्थित गर्छु र अनुवादकहरूको प्रबन्ध मिलाउँछु। साथै अन्तिम म्यादभन्दा अगाडि नै परियोजना सकाउन योजना बनाउँछु। हामी विभिन्न वेबसाइटहरू, उत्पादनका निर्देशिकाहरू र सफ्टवेयरका विशिष्टपत्रहरू अनुवाद गर्छौँ। हामी 10 भन्दा धेरै भाषामा काम गर्छौँ। मेरो टिममा जापानी, ब्राजिलियन, अमेरिकी र भियतनामीहरू छन्।
उनीहरूसित काम र कुराकानी गरेर उनीहरूको देशको बारेमा सिक्न मलाई रमाइलो लाग्छ। अनुवाद सकिएपछि प्रुफरिडिङ गरी अन्तिम गुणस्तर जाँचेर पक्का गरेपछि ग्राहकहरूलाई अनुवाद पठाउँछु। अनुवादको काम अहिले धेरै बढ्दै गएकोले म हरेक दिन व्यस्त हुन्छु।

म तपाईँलाई टोक्योमा काम गर्न आग्रह गर्छु किनभने यहाँ तपाईँ व्यापक काममा संलग्न हुन सक्नुहुन्छ। हालको कम्पनीमा मैले अनुवाद सम्बन्धी 10 करोड येनभन्दा धेरैको काममा समावेश भएँ। हामीले थुप्रै सदस्यसित मिलेर छ महिनामा एउटा परियोजना पूरा गऱ्यौँ। काम गर्दा थुप्रै समस्याहरू आए तापनि अनुवाद पूरा गरेर ग्राहकलाई पठाउन पाउँदा असाध्यै खुसी लाग्यो। अर्को रोचक कुरा भनेको कामको प्रकार व्यापक छ भन्ने कुरा हो। म विभिन्न प्रकारको अनुवादको काम ह्यान्डल गर्छु।
उदाहरणको लागि, कर्पस भनिने भाषिक डेटाबेस छ, जसमा जापानी भाषाबाट चिनियाँ भाषा वा अङ्ग्रेजी भाषाजस्तो एउटा भाषामा मात्र अनुवाद गर्ने नभई जापानी भाषाबाट एकैपटक दक्षिणपूर्वी एसियाली र युरोपेली भाषाहरू पनि समावेश गरेर धेरै भाषाहरूमा अनुवाद गरिन्छ। अनि मैले कागजसित सम्बन्धित अनुवादबाहेक वेबसाइट, उत्पादन निर्देशिका र गेमहरूजस्ता विभिन्न किसिमको अनुवादको काम ह्यान्डल गरेको छु। ठूलो परियोजना आउँदा सुरुमा कार्य विभाजन गर्नुपर्छ र त्यसलाई प्रभावकारी रूपमा व्यवस्थापन गर्न टिमको रूपमा काम गर्नुपर्छ।

प्राथमिक स्कुलमा छँदा मलाई "ड्र्यागनबल"-जस्तो जापानी एनिमेसन मन पर्थ्यो। म प्रायः त्यस्तो एनिमेसनहरू हेर्थेँ। मलाई जापानी संस्कृति र भाषामा चासो जाग्यो। त्यसैले जुनियर हाई स्कुलमा मैले जापानीलाई आफ्नो दोस्रो भाषाको रूपमा रोजेँ। मलाई पहिल्यैदेखि जापानी भाषामा चासो भएकोले स्कुलको पढाइ गाह्रो लागेन। मैले एक रातमै हिरागाना कण्ठ पारेँ। स्कुलमा मेरा थुप्रै साथीहरूले जापानी भाषा रोजे। त्यसपछि म विश्वविद्यालयमा भर्ना त भएँ तर मैले रोजेको प्रमुख विषय राजनीति विज्ञान मन नपरेकोले पढाइ छोडेँ। मलाई जापानमा चासो थियो र जापानी भाषा पढ्दै थिएँ। त्यसैले मैले जापान जाने निर्णय गरेँ। सुरुमा म भाषा स्कुलमा भर्ना भएँ अनि जापानी भाषा राम्रो भएपछि व्यावसायिक विद्यालयमा भर्ना भएँ।
पछि म कान्साईको विश्वविद्यालयमा भर्ना भएँ र अर्थशास्त्र फेरि सुरुदेखि नै पढेँ। म पहिलो चोटि सन् 2008 को गर्मीयाममा टोक्यो आएको थिएँ। टोक्योका सडकहरू निकै चौडा थिए अनि मानिसहरू पनि थुप्रै थिएँ। हुनत चीन धेरै जनसङ्ख्या भएको देश हो तर टोक्योमा मेरो गृहनगर शेन्याङमा भन्दा धेरै भीडभाड छ।
विश्वविद्यालयबाट स्नातक गरेपछि मैले ओसाकाको अनुवाद कम्पनीमा काम गर्न थालेँ। त्यहाँ चार वर्ष अनुवाद संयोजकको रूपमा काम गरेपछि अझ व्यापक काम गर्न चाहने इच्छा जागेकोले मैले त्यो काम छोडेर टोक्योको सनफ्लेयर कम्पनीमा काम गर्न थालेँ। मैले सनफ्लेयर रोज्नुको कारण चाहिँ यहाँ मैले आफ्नो विगतको अनुभव उपयोग गर्न सक्छु र यो अनुवाद उद्योगमा सबैभन्दा ठूलो अनुवाद कम्पनी पनि हो।

मेरा थुप्रै सोखहरू छन् र म टोक्योमा ती सबैको आनन्द उठाउन सक्छु। जापानमा आएपछि पेशेवर बेसबल मन पर्न थाल्यो र आफ्नो मन पर्ने टिमलाई समर्थन गर्छु। टोक्योमा मुख्य दुइटा बेसबल रङ्गशाला छन् र त्यहाँ थुप्रै मानिस गेम हेर्न आउँछन्। मलाई आफ्नो कम्प्युटरहरू बनाउन पनि मन पर्छ। त्यसैले विदेशबाट आयात भएका पाटपुर्जाहरू हेर्न आकिहाबारा जान्छु। आकिहाबारामा कम्प्युटर सम्बन्धी लगभग सबै पाटपुर्जाहरू पाइन्छ। त्यहाँ नजिकै सपिङ मलहरू र सिनेमा हलहरू पनि छन्। टोक्यो परिवारसँग बस्नको लागि सजिलो सहर हो। जापानी भाषा सिक्नको लागि अहिले पनि म जापानी किताबहरू र माङ्गा पढ्छु अनि नाटकहरू हेर्छु।
माङ्गाले जापानी सिक्न मलाई सबभन्दा धेरै मदत गरेको छ। अहिले मलाई "वान पिस" भन्ने माङ्गा एकदमै मन पर्छ।
　टोक्योमा तपाईँले धेरै देशका खानेकुरा खान सक्नुहुन्छ। केही दिनअघि म्यानमारको अनुवाद परियोजना सफलतापूर्वक सकेको उपलक्ष्यमा म र मेरा सहकर्मीहरूले म्यानमार रेस्टुरेन्टमा पार्टि गऱ्यौँ। खोज्यो भने जुनसुकै देशका रेस्टुरेन्टहरू भेट्टाउन सकिन्छ।
　टोक्यो पनि हरियालीले भरिएको छ। कहिलेकाहीँ म बट्टामा खाना प्याक गरेर लान्छु र प्रकृतिको आनन्द उठाउँदै आरामदायी समय बिताउँछु।