अहिले म लेखा सम्बन्धी काम गर्छु। लेखाको काममा पैसाको हिसाबकिताब गर्नुपर्छ, त्यसैले काम सही तरिकामा गर्नु निकै जरुरी हुन्छ। मसित लेखा सम्बन्धी ज्ञान नहुँदा मैले सहकर्मीहरूसित कुराकानी गर्न निकै मेहनत गर्नुपरेको थियो। तर आफूले त्यस्तो मेहनत गरेकोमा म निकै खुसी छु किनकि कम्पनीका मानिसहरू अहिले ममा भर पर्छन्। तैपनि म सन्तुष्ट भएको छैनँ अनि म आफूलाई नयाँ कर्मचारी नै ठान्छु। किनकि आफू नयाँ नै छु भन्ने मनोभाव राख्दा नम्र भइरहन अनि जे पनि सिक्न सकिन्छ।
अहिले मैले लेखा सम्बन्धी काम गरिरहेकोले कम्पनीको व्यवस्थापन कस्तो छ भन्ने कुराको अनुमान लगाउन सक्छु। म आफ्नो सीप अझै तिखार्न चाहन्छु अनि कुनै दिन त्यो ठाउँमा पुग्न चाहन्छु, जहाँबाट व्यवस्थापन नीतिबारे केही टिप्पणी दिन सक्छु। अरूबाट भरोसा कमाउन भुक्तानी मितिजस्ता काम सिद्ध्याउनुपर्ने मितिप्रति सजग हुनु अनि त्यसैअनुसार काम गर्नु निकै महत्त्वपूर्ण छ। म उचित तालिका बनाउन चाहन्छु अनि काम गर्न सजिलो महसुस गर्न सक्ने वातावरण बनाउँदै सहकर्मीहरूको सहयोगी हुन चाहन्छु।

टोक्योमा काम गर्दा अरू सबै कुराभन्दा व्यवसायमा देखाउनुपर्ने शिष्टाचार सिक्न सकिन्छ। जापानी मानिसहरूको लागि शिष्टाचार देखाउनु भनेको सामान्य कुरा हो। म पहिलो चोटि जापान आउँदा मलाई यही कुराको चिन्ता लागेको थियो। मैले जापानीहरूको व्यवहार अनि नम्रताबारे टिभीमा देखाइने आफूलाई मन पर्ने जापानी नाटकहरू हेरेअनुसार अभ्यास गरेँ। तोकेरै भन्नुपर्दा "नाओकी हान्जावा" नाम गरेको नाटक हेर्दा निकै रमाइलो लाग्यो अनि विभिन्न कुराहरू सिक्न सकेँ। जस्तै, वित्तीय क्षेत्रको सङ्घर्षमय वातावरणमा गर्नुपर्ने खास आचारबारे राम्रोसँग चित्रण गरिएको थियो। "जस्तो देश उस्तै भेष" भनेझैँ म पनि अरूसित जापानीहरूले जस्तै राम्रो व्यवहार अनि नम्र मनोवृत्ति देखाइरहन चाहन्छु।
शिष्टाचारको अलावा टोक्योमा काम गर्नुको अन्य आकर्षक पक्षहरू पनि छन्। आफूलाई सुम्पिइएको काम पूरा गरे भइहाल्छ नि भन्ने मनोभाव स्वीकार्य हुँदैन। बरु आफू अग्रसर भएर सक्रियातासाथ काम गर्नु महत्त्वपूर्ण छ। त्यसो गर्दा तपाईँले ठूलो सपना अनि लक्ष्य राख्न सक्नुहुन्छ अनि लक्ष्य हासिल गर्न कडा मेहनत गर्ने मनोवृत्ति खेती गर्न सक्नुहुन्छ। जुन उमेरको भए पनि त्यसरी नै आफूलाई चुनौती दिन सकिन्छ भन्ने कुरा मैले टोक्यो आएपछि थाह पाएँ। म टोक्योमा अझै अघि बढ्न अनि यहाँको राम्रो पक्षहरू लिइरहन चाहन्छु।

जुनियर हाई स्कुलमा छँदा म टोक्योदेखि निकै प्रभावित भएँ। टिभीमा देखाइने जापानी नाटक हेर्दा मैले टोक्यो पनि देखेँ। मेरो देशको नजिकै त्यस्तो ठूलो सहर रहेछ भन्ने कुरा थाह पाउँदा म निकै उत्साहित भएँ। टोक्यो ठूलो सहरको वातावरण मात्र होइन, त्यहाँको आकर्षक वातावरणमा लन्च खाने मानिसहरूलगायत दैनिक जीवनका विभिन्न कुराहरूप्रति पनि निकै मोहित भएँ। मैले टोक्योबारे धेरै कल्पना गरेँ। तैपनि त्यहाँ गइसकेपछि भने आफूले कल्पना गरेकोभन्दा धेरै कुराहरू फरक अनि निकै राम्रो देखेँ। मलाई भाषा सिकाउने शिक्षकसितै म सिबुया, इकेबुकुरो अनि सिन्जुकुजस्ता धेरै प्रख्यात ठाउँहरू घुमेँ। मलाई अझै याद छ, त्यतिबेला म थुप्रै अग्ला-अग्ला बिलडिङहरू, त्यहाँका सुन्दर सहरी दृश्य अनि मानिसहरूको भीडले गर्दा निकै प्रभावित भएको थिएँ। म टोक्योमा बस्न चाहन्थेँ किनकि मलाई यहाँ नयाँ प्रेरणा पाउन अनि रमाइलो तरिकामा जीवन बिताउन सकिन्छ जस्तो लाग्यो।
हुनत मसित चीन गएर अर्को जागिर खाने मौका थियो। तर लक्ष्यप्रति अति सजग भएर आफ्नो सीप तिखार्ने इच्छा जागेकोले मैले टोक्योमै बसेर संघर्ष गर्ने निर्णय गरेँ। मैले सोचेजस्तै म अहिले टोक्योको चुनौतीपूर्ण जीवनमा निकै उन्नति गर्दै छु। तोकेरै भन्नुपर्दा म अहिले अन्तर्राष्ट्रिय वातावरणमा बसेर विभिन्न किसिमको विचारधारासित आफूलाई परिचित गराउँदा निकट भविष्यको लागि मात्र नभई पछिसम्मको लागि पनि सकारात्मक असर पर्छ जस्तो मलाई लाग्छ। पहिला मैले टोक्यो सर्ने निर्णय गर्दा मेरो परिवार निकै चिन्तित थियो। तर अहिले उहाँहरूले म के गर्दै छु भनेर बुझ्नुभएको छ, ढुक्क महसुस गर्नुहुन्छ अनि मलाई भेट्न टोक्यो पनि आइसक्नुभएको छ। मैल एकचोटि मेरो परिवारलाई टोक्योको स्काइ ट्रि नाम गरेको अग्लो टावरमा लगेँ अनि उहाँहरू धेरै खुसी हुनुभयो। उहाँहरू टोक्यो आउनुभएकोमा म पनि निकै खुसी थिएँ।

म टोक्योमा सक्दो घरबाहिर गएर गर्ने कामहरूको लागि समय निकाल्छु। मलाई विशेषगरि नियमित रूपमा गर्ने शारीरिक क्रियाकलापहरू अनि तनावमुक्त हुनको लागि व्यायाम गर्न मन पर्छ। म फराकिला ठाउँहरू जस्तै, योयोगी पार्क गएर साइकल चलाएर शारीरिक कसरत गर्छु। अचम्मलाग्दो कुरा त योयोगी पार्क ठूलो सहरको बीचमा भए पनि प्राकृतिक कुराहरूले भरिएको छ। टोक्योमा घुम्न जाने ठाउँहरूमध्ये यो सबैभन्दा राम्रो ठाउँ हो। यहाँ यस्तो ठाउँ प्रायः देख्न पाइँदैन। साइकल चलाउनेबाहेक म स्वास्थ्य राम्रो बनाउने काम जस्तै, हट योगा गर्छु। म छुट्टीको दिनमा आफ्नो स्वास्थ्यलाई कसरी ध्यान दिन्छु, त्यसले काममा म कस्तो गर्छु त्यसलाई निकै असर गर्छ। त्यसैले म टोक्योमा आफ्नो ख्याल राम्रोसित राख्छु। स्वास्थ्य राम्रो बनाउन गर्ने विभिन्न क्रियाकलापको अलावा म साथीहरूसित अनि सहकर्मीहरूसित खाने पनि गर्छु अनि यो निकै महत्त्वपूर्ण छ।
म अक्सर आफ्नो वा साथीको घरमा मःमः अनि "नाबे (हटपट)" पार्टी आयोजना गर्छु। हालै म विभिन्न परिकारहरू बनाउने कोसिस गर्दै छु, जस्तै जापानी, इटालियन र कोरियन। मेरा साथीहरूलाई मैले बनाएको खाना मन पर्छ। टोक्योमा थुप्रै किसिमका खानेकुराहरू पाइन्छ, त्यसैले मैले खाना बनाउने सम्बन्धी विभिन्न कुराहरू सिक्न सकेको छु। थुप्रै मानिसहरूसित रमाइलो गर्दा म दैनिक जीवनका तनावहरू बिर्सन सक्छु अनि परिवारसित भएको जस्तै महसुस गर्छु। यसले गर्दा शान्ति मिल्छ। टोक्योमा मैले निकै उन्नति गर्न सकेको छु। अनि व्यस्त भए पनि साथीहरू हुनु कत्ति महत्त्वपूर्ण छ भनेर सिक्ने मौकाहरू पाएको छु।