हामी विश्वविद्यालयहरू तथा अनुसन्धान संस्थानहरूसित साझेदारी गरेर अन्तर्राष्ट्रिय जनसम्पर्कका चुनौतीहरूको लागि प्रतिकारात्मक उपायहरू उपलब्ध गराउँछौँ। उदाहरणको लागि, जापानका विश्वविद्यालयहरू तथा अनुसन्धान संस्थानहरूको एउटा तत्कालको चुनौती भनेको तिनीहरूको नाम संसारमा अझै परिचित गराउनु हो। यसको समाधान गर्न ग्राहकले हालसालै गरेको अनुसन्धानका परिणामहरू अन्तर्राष्ट्रिय श्रोताहरूसम्म रुचिकर तरिकाले तथा समयसापेक्ष प्रचलन, चाहे विद्युतीय माध्यम होस् वा छापिएका साधनहरू चलाएर सञ्चार गर्नु आवश्यक हुन्छ। तथापि विश्वविद्यालयहरू तथा संस्थानहरूलाई आवश्यक विशेषज्ञता हासिल गर्न गाह्रो हुन्छ, जसले तिनीहरूको संस्थानमा गरिएका विभिन्न प्रकारका वैज्ञानिक अनुसन्धानलाई विश्वव्यापी रूपमा ठीक समयमा प्रभावकारी ढङ्गले सञ्चार गर्न सकियोस्।
हाम्रो काम भनेको त्यस्ता आवश्यकताहरूको समाधानको लागि वैज्ञानिक लेख लेखेर, सम्पादन गरेर अनि वर्कशपहरू गरेर नेचरको विशेषज्ञता उपलब्ध गराउनु हो। ग्राहकहरूलाई समाधानहरू उपलब्ध गराउन सक्नु नै मलाई हालको ओहोदामा सबैभन्दा बढी उत्प्रेरित गर्ने कुरा हो। निरन्तर विकसित भइरहने चुनौतीहरूको सामना गर्दै, प्रचलित प्रवृत्तिहरूलाई आत्मसात् गर्दै नयाँ समाधानहरू सिर्जना गर्नुपर्ने भएकोले यो काम मलाई एकदम रमाइलो लागिरहेको छ।

मैले आफ्नो गृहनगर हङकङ छोडेर टोक्योलाई आफ्नो कार्यस्थलको रूपमा छान्ने ठूलो कदम चाल्नुको पछाडि धेरै कारणहरू छन्। तीमध्ये मुख्य कारण भनेको टोक्यो "अन्तर्राष्ट्रिय" र "अग्रणी" ठाउँ हो। मैले पहिला काम गरेका सम्पूर्ण कम्पनीहरू पूर्णतया अन्तर्राष्ट्रिय थिए र खास गरी मैले हाल काम गरिरहेको ठाउँमा अमेरिकी, बेलायती, जर्मन, नेपाली र चिनियाँहरूलगायत विभिन्न राष्ट्रका दक्ष मानिसहरू छन्, जो आ-आफ्नो कार्यक्षेत्रमा सक्रिय छन्। आफ्नो कार्यस्थलमा काम गर्दै विभिन्न संस्कृति तथा मान्यताहरू अनुभव गर्न पाउनु उत्साहजनक कुरा हो। मेरो विचारमा वार्तालापलाई प्राथमिकता दिँदै अर्को व्यक्तिको अवस्था र दृष्टिकोणको कदर गर्दै कामकुरा अघि बढाउने प्रयास गर्नु महत्त्वपूर्ण छ। हो, मेरो जापानी, अङ्ग्रेजी, चिनियाँ भाषाजस्ता सीपहरूलाई पूर्णतया प्रयोग गर्दै यो काम गर्न सक्नु एकदमै सन्तोषजनक कुरा हो।
अर्को कारण भनेको विज्ञान र प्रविधिमा मलाई सानो बेलादेखिनै चासो थियो। टोक्योमा थुप्रै विश्वस्तरीय अनुसन्धानकर्ताहरू र अनुसन्धान सङ्गठनहरू भएकोले गर्दा हङकङको वित्तीय केन्द्रको साटो मैले टोक्योलाई रोजेँ। म आफूलाई निकै भाग्यशाली ठान्छु किनभने मैले थुप्रै विश्वस्तरीय अनुसन्धानकर्ताहरू तथा सहकर्मीहरूसित काम गर्ने अवसर पाएको छु।

मेरो जापानसँगको सम्पर्क हाइ स्कुलको विद्यार्थी हुँदाखेरि जापान सरकारको शिक्षा, संस्कृति, खेलकुद, विज्ञान तथा प्रविधि मन्त्रालयले छात्रवृत्ति कार्यक्रमको लागि भर्ना लिन टाँसिएको पोस्टरबाट सुरु भयो।
म पहिलेदेखि विदेशमा अध्ययन गर्न चाहन्थेँ अनि मलाई एसियाली देशहरूमा चासो भएकोले गर्दा मेरा धेरैजसो साथीहरूले जान रोजेका अमेरिका अथवा युरोपको सट्टा मैले जापान सरकारको छात्रवृत्ति कार्यक्रममा आवेदन दिएँ। खुसीको कुरा मैले छात्रवृत्ति हासिल गर्न सकेकोले त्यतिखेर अध्ययन गर्दै गरेको चाइनिज युनिभर्सिटी अफ हङकङ छोड्ने निर्णय गरेँ।
सुरुमा त थुप्रै मानिसहरूले जापानमा अध्ययन गर्ने मेरो निर्णयको विरोध गरे। यसो हुनुको कारण भनेको मैले स्नातक हासिल गर्न हङकङमा गरिने अध्ययनको तुलनामा जापानमा थप एक-दुई वर्ष बिताउनुपर्ने मात्र नभई सामान्यतया जापानी विश्वविद्यालयहरूभन्दा हङकङका विश्वविद्यालयहरू उच्च श्रेणीका हुन्थे। त्यसमाथि अर्को कठिनाइ भनेको सबै लेक्चरहरू जापानी भाषामा सञ्चालन हुने थिएI यी सबका बाबजुद विदेशमा अध्ययन गर्ने मेरो इच्छा बलियो थियो र अन्तमा मैले जापान नै जाने निर्णय गरेँ। मैले ओसाका युनिभर्सिटी अफ फरेन स्टडिजमा आफ्नो अध्ययन सुरु गरेँ र एक वर्षसम्म जापानी भाषा सिकेपछि अर्थशास्त्र अध्ययन गर्न टोक्योस्थित हितोत्सुबाशी युनिभर्सिटीमा प्रवेश गरेँ।
विश्वविद्यालयबाट स्नातक गरेपछि मैले फेरि आफ्नो जापानी भाषा तथा संस्कृति बुझ्ने क्षमतालाई राम्रो बनाउन चाहेकोले अझै जापानमै बसेर जापानी कम्पनीमा प्रवेश गरेँ। पहिला टोक्योस्थित ठूलो टेलिकोम्युनिकेसन कम्पनीमा सफल कार्यकाल बिताएँ। तर पछि मैले निरन्तर अवसरहरू खोज्दै वित्तीय र विज्ञापनजस्ता विभिन्न उद्योगहरूमा मेरो करियर बनाउन थालेँ, जहाँ मैले आफ्नो भाषिक क्षमता पूर्णतया प्रयोग गर्न सकेँ। यत्तिका वर्षहरूको अनुभवबाट मैले ग्राहकहरूसित कुराकानी गर्दै र तिनीहरूको आवश्यकताहरूको समाधान उपलब्ध गराउँदै काम गर्दा साँच्चै आनन्द महसुस गर्न सकेको याद गरेँ। त्यसैले मैले हालको कम्पनीमा काम गर्ने छनौट गरेको हुँ।

टोक्यो उत्कृष्ट सहर हो, जसका दुई पाटा छन्: "क्रियाशील" अनि "शान्त"। मलाई टोक्योमा बस्न निकै रमाइलो लाग्छ, जहाँ मैले आफ्नो इच्छाअनुसार कसरी समय बिताउने भनेर छनौट गर्न सक्छु। म “क्रियाशील” भएर बस्न चाहेको खण्डमा अहिलेको विश्वव्यापी प्रवृत्तिहरूलाई प्रतिबिम्बित गरिरहेका कला र इभेन्ट, व्यवसाय, सूचना आदि विभिन्न नयाँ-नयाँ कुराहरू एक पछि अर्को टोक्योमा आइरहेको पाउन सकिन्छ। अर्कोतर्फ तपाईँलाई “शान्त” हुन मन लागेको खण्डमा टोक्योले निराश बनाउने छैन। टोक्योको केन्द्रबाट ३० मिनेटको दूरीभित्र पार्कहरू, डाँडाहरू तथा प्राकृतिक संरक्षणहरू लगायत आराम गर्ने प्रशस्त ठाउँहरू छन्। टोक्योको केन्द्रमा पनि तपाईँले रेस्टुरेन्टहरू तथा क्याफेहरूसहित तनावमुक्त हुने प्रशस्त ठाउँहरू पाउन सक्नुहुन्छ। यी दुई पाटाहरूले टोक्योलाई यहाँका विदेशीहरू बस्नको लागि सुविधाजनक र आरामदायी सहर बनाएको छ।
बिदाको दिनमा म प्रायजसो मेरा बच्चाहरूलाई नजिकैको पार्कहरूमा वा सपिङ मलमा लैजान्छु। त्यस्ता ठाउँहरूमा जान सार्वजनिक यातायातबाट यात्रा गर्नु एकदम सजिलो अनि सस्तो पनि छ, अनि यसले गर्दा मैले आफ्नो परिवारसँग धेरै समय रमाइलो गर्न पाएको छु।
हो, खाना पनि टोक्योको महत्त्वपूर्ण भाग हो अनि मैले यसबारे वर्णन गरिनँ भने मैले लापरबाही गरेको हुनेछु। खाना आफैले पकाउनु रमाइलो हुन्छ किनभने टोक्योमा तपाईँलाई मन पर्ने खाना तयार गर्न आवश्यक सबै प्रकारका सामानहरू पाइन्छन्। अर्कोतर्फ बाहिरै खाना खानु साथीहरूसित रमाइलो समय बिताउने राम्रो तरिका हो। जापानी खानाका प्रकारहरूमध्ये मलाई "काइसेकी-ऱ्योरी" मन पर्छ, जसको अर्थ धेरै प्रकारका, सानासाना सजावट गरिएका जापानी खानाहरूबाट तपाईँ प्रसन्न हुनुहुनेछ भन्ने हो। सम्भव भएमा म आफ्ना विदेशी साथीहरूलाई जापानीहरूले एकदमै मीठो मानेका वास्तविक स्थानीय खानाहरू खुवाउन चाहन्छु। मलाई आफ्ना साथीहरूलाई स्थानीय बासिन्दाहरू मात्र जाने ठाउँहरूमा लैजान मन पर्छ।