जापान आएपछि कानसाइको जापानी भाषा स्कुल र व्यावसायिक स्कुलमा अध्ययन गरेँ र काम पाएको मौका छोपेर टोक्योमा सरेँ। टोक्योको आकर्षण यो हो कि हामी धेरै व्यक्तिलाई भेट्छौँ र टोक्यो विभिन्न रोजगारीका अवसरहरूले भरिपूर्ण छ। साथै टोक्योमा संसारभरिबाट काम गर्नेहरू र घुम्न आउनेहरू जम्मा हुने भएकोले विदेशीलाई बसोबास गर्न सजिलो सहर हो जस्तो लाग्छ।
हाल म साकुरा होटेल इकेबुकुरोमा काम गर्छु, जहाँ डिपार्टमेन्ट स्टोर, अम्युजमेन्ट पार्क र कलात्मक नाट्यशाला जस्ता सुविधाहरू छन् र संसारका विभिन्न देशहरूको खाना र सांस्कृतिको मजा लिन सक्ने रोमाञ्चकारी ठाउँ हो। अर्कोतर्फ, मलाई पहिले खटाइएको निप्पोरी भन्ने ठाउँचाहिँ पुरानो समयको नगर हो, जहाँ सिन्तो धर्म र बुद्ध धर्मका धेरै प्रसिद्ध मन्दिरहरू पनि छन्। टोक्योमा प्रत्येक क्षेत्रको आ-आफ्नो छवि र माहोल एकदम फरक हुन्छ। टोक्योको बारेमा जति धेरै थाह पाउँदै जानुहुन्छ, त्यत्ति नै तपाईँले नयाँ कुराहरू पत्ता लगाउनुहुनेछ। यो नै टोक्योको रमाइलो पक्ष हो जस्तो मलाई लाग्छ।

म इकेबुकुरोबाट रेलमा 15 मिनेटमै पुग्ने शान्त बस्तीमा बस्छु। सिङ्गापुरमा आवासको वातावरण नाजुक भएकोले युवाहरूलाई एक्लै बस्न गाह्रो हुन्छ तर टोक्यो यति सुविधाजनक छ कि एकल व्यक्तिको घरपरिवारको लागि त्यत्ति महँगो नभएका भाडामा धेरै कोठाहरू पाइन्छन् र नजिकै स्थानीय समुदायमा आधारित सपिङ अर्केडहरू पनि छन्। आफैले खाना पकाउने र पैसा बचत गर्ने जस्ता तरिकाहरू अपनाएर गुजारा चलाउँदै आएकोले म आत्मनिर्भर हुन सक्षम भएको छु जस्तो मलाई लाग्छ। यसै सिलसिलामा भन्ने हो भने, मलाई सबभन्दा राम्रोसँग पकाउन आउने खानाको प्रकार भनेको तरकारी र माछा प्रशस्तै हालेर पकाएको भात हो। म व्यस्त हुँदा पनि सकेसम्म सन्तुलित भोजन खाने कोसिस गर्दै छु।
छुट्टिको दिनमा जुडोको वयस्क क्लबमा पसिना बगाउँदै जुडो खेल्ने र नजिकको वृद्धाश्रममा सँगै महजोङ्ग खेल्ने स्वयंसेवा गर्ने गर्छु। सँगै महजोङ्ग खेल्ने साथीहरू प्रायः वृद्धवृद्धाहरू हुनुहुन्छ तर उहाँहरूबाट उहिलेको जापान र टोक्योको बारेमा सुनेका कुराहरू मलाई रोचक लागिरहेका छन्। हाकोने र कामाकुराजस्ता टोक्योबाट एक दिनमा गएर फर्किन सक्ने धेरै पर्यटकीय स्थान पनि छन्। मौका छोपेर ती ठाउँहरू जाने गर्छु।

मैले फ्रन्ट डेस्क अपरेसनको जिम्मेवारी लिएको छु, जसमा चेक-इन सञ्चालनदेखि लिएर ग्रुप रिजर्भेसनको आवेदन लिने काम, पाहुनाहरूको लागि कन्सियर्ज सेवा समावेश छन्। विश्वविद्यालयमा आईटी अध्ययन गरी ट्राभल एजेन्सीमा काम गर्ने अनुभवको फाइदा उठाएर मैले पार्टीमा आउने पर्यटकहरूको बुकिङ केन्द्रीय व्यवस्थापन गर्ने सिस्टम आफै विकास गर्ने, ट्राभल एजेन्सीको सेल्स जिम्मेवार कर्मचारीसँग वार्तालाप गर्नेजस्ता नयाँ काम गर्ने कोसिस पनि गर्दै छु।
हाल कोरोना महामारीको कारण विदेशी ग्राहकहरूको सङ्ख्या घटेको छ तर हामी टेलिवर्क समर्थन प्लान, व्यावसायिक यात्रा समर्थन प्लान र परीक्षार्थीहरूको लागि आवास प्लान आदि तयार गरेर आवास सेवाहरू विविधिकरण गरी सक्रियताका साथ जापानी ग्राहकहरूलाई निम्त्याउने प्रयास गर्दै छौँ। निकट भविष्यमा जब विदेशी यात्राको माग फेरि बढ्दै जान्छ, तब हामी साकुरा होटेलमा नयाँ सेवा सुरु गर्न चाहन्छौँ, जसले आवास सेवाहरू मात्र नभई टिकटको व्यवस्था र पर्यटन टुर पनि वन-स्टपमा प्रदान गर्छ। जापानी ग्राहकहरू र विदेशी पर्यटकहरूबीचको विनिमय इभेन्ट पनि आयोजना गरी साकुरा होटेललाई अन्तर्राष्ट्रिय विनिमयको केन्द्रको रूपमा पनि उकास्न चाहन्छौँ।

साकुरा होटेल टोकियोमा भएका विदेशी पर्यटकहरूको लागि आवास सुविधाको अग्रणी मानिन्छ। परिवारमा भएजस्तो सौहार्दपूर्ण आतिथ्यलाई आदर्श बनाई हामी पटक-पटक विभिन्न विनिमय कार्यक्रम सञ्चालन गर्छौँ। "योमोडा-काई" एकदमै लोकप्रिय थियो। यस इभेन्टमा विदेशबाट आएका ग्राहकहरूले घरमा पकाइने खाना पकाउन सिकाउन सक्छन् र होटेलमा भएका सबै जनासँगै मिलेर खान सक्छन्। त्यहाँ प्राप्त भएका रेसिपीहरूमध्ये कतिपयलाई रेस्टुरेन्टमा "ग्र्यान्ड मदर रेसिपी"-को नाममा प्रस्तुत गरिएको छ। हामीले हालै कोरोना महामारीको कारण आयोजना गर्न सकिरहेका छैनौँ। तर हाम्रा प्रत्येक होटेलले विभिन्न इभेन्टको योजना बनाइरहेको छ। जस्तै, निप्पोरीमा यानाका गिन्जावरिपरि घुम्ने, आसाकुसामा सुमो खेल हेर्ने, इकेबुकुरोमा (म यहाँ काम गर्छु) कावागोए घुम्ने र नयाँ वर्षको सुरुमा मन्दिर भ्रमण गर्ने।
यस्तो इभेन्टमा पहिले पनि सहभागी भएकोले मैले साकुरा होटेलमा काम गर्ने मौका पाएँ। मैले पहिले पर्यटन व्यवसायमा काम गर्ने लक्ष्य राखेर ट्राभल एजेन्सीमा जागिर पाएको थिएँ। तर मैले महसुस गरेँ कि ग्राहकसेवामा लाग्दा म विश्वभरिबाट आउने ग्राहकहरूसँग सीधै अन्तरक्रिया गर्न सक्छु र यो काम मेरो लागि बढी उपयुक्त छ।
जापानी आतिथ्यमा ससानो कुराको पनि राख्ने ख्याल र ठीक दूरीको सम्बन्धलाई महत्त्व दिइन्छ। ग्राहकलाई मदत मिलोस् भनेर मनैदेखि सेवा प्रदान गरी मित्रवत् व्यवहार गर्ने अतिथिसत्कार नै साकुरा होटेलको चिनारी हो। कहिलेकाहीँ हामी आफ्ना ग्राहकहरूसँग चिनाजानी गर्छौँ र कामपछि सँगै घुम्न जान्छौँ। अनि हामीले यस्तो खुसीको खबर पाएका छौँ कि साकुरा होटेलमा पहिलो चाटि भेटेर चिनेका ग्राहकहरूले पछि विवाह गर्नुभयो। मानिसहरूसँग धेरै न्यानो भेटघाट हुने यो काम गर्दा म हरेक दिन सन्तोषजनक तरिकाले जीवन बिताइरहेको छु।
हामी ग्राहकहरूलाई साकुरा होटलको अद्वितीय मैत्रीपूर्ण ग्राहकसेवा प्रदान गरी जापानको आकर्षण र टोक्योको आकर्षणलाई 'जापानी घर'-को रूपमा परिचित गराउन चाहन्छौँ। साथै जापानी ग्राहकहरूलाई पनि संसारभरिबाट आएका ग्राहकहरूसँग कुराकानी गरेर सँगै समय बिताउन सक्ने ठाउँको रूपमा साकुरा होटेललाई ग्राहकहरूको माया पाउन लायकको होटेल बनाउन चाहन्छु।